經過10個鐘嘅車程, 終於黎到Darwin喇~~
第二朝由一個叫Jacky嘅工頭伙計黎接我
車程大約一個鐘, 黎到一個叫Humty Doo嘅近郊
原諒我大驚小怪
本以為長豆農場就係一個只有一大片種長豆嘅地
原來呢度仲有辣椒苦瓜芒果大樹菠蘿etc etc etc
長豆區由兩個越南人合資, Andy同阿爽
Andy負責農藥同訂單, 有一個叫阿蓉嘅越南女仔幫手
而我就跟阿爽摘豆, 亦係阿爽唯一一個伙計
13AUS per hr, 黑工 (老闆無報稅, 離開澳洲無得退稅)
長豆大得好快, 所以每一日都要摘
朝七晚六, 兩個鐘時間食午餐
星期六日都無例外, 因為如果等到過長都唔摘就唔賣得
摘既方法係用手指工壓斷d豆, 唔可以用較剪否則採摘速度會慢左
所以我第一日只係做左一個下晝已經拉傷左指甲同手指之間嘅裂縫...
農場
鐵皮廁所 要沖凍水涼
夜晚大家一齊食飯飲酒睇電視
第一次接觸越南人, 說實話俾我既印象係佢地好咸濕
一餐飯講左幾次女人 (靠阿蓉翻譯所知)
Andy更加好唔客氣咁用英文同我講話望住我對腳會諗起某d野
還好我每日淨係食飯先見到佢
亦好在席間有移民澳洲7年, 已經練得一控零口音流利英文既阿蓉間中當調停
阿蓉係Melborne開時裝店, 上黎Darwin做一陣農場當賺外快
細問之下得知因為越南生活環境好差, 一家人都支零破碎
佢24歲有幸搬黎澳洲先開始學英文, 所以好羨慕香港教育有教
回想小妹兩三歲開始背A-Z, 但20年黎一直不求甚解但求過關, 不禁有點慚愧...
好好人嘅阿蓉仲話去到Melbourne可以帶我周圍玩!
阿爽仲開個火爐烤羊排
請左幾舊我食, 好滿足
太好喇終於告別失業大軍喇!!!
第二日, 正當我懷住感恩既心情起身
阿爽忽然同我講, 由於我摘得太慢
所以決定將我由13AUS/hr轉做15AUS/box, 最多佢煮埋我飯
直到我可以一日摘到十盒為止
但係對一個新手黎講, 我第一日只可以摘到5盒
即係人工由一日13x9=117AUS
變成15x5=75AUS.....
無辦法啦, 一時三刻都搵唔到第個農場做
將籃掛住喺身, 摘滿就倒落大箱
咁大箱為之一盒
狗仔
長豆花原來係咁樣
好多唔同品種嘅害蟲, 有時手快會差d禁左落去, 好嘔心!
其實咁樣喺田重復同一個動作, 曬足一日都咪話唔辛苦,
孱弱城市人, 一時三刻都幾難接受
第三日起身一直係度掙扎仲做唔做廉價勞工
但諗起破產仲點繼續我嘅旅程
起身摘豆啦唉!!
由於指甲同同手指嘅裂縫已經拉傷左
我改用手指公嘅力
經過兩日嘅操勞, 起左個水泡/__\
應該到起枕我就可以摘到好快啦
距離收工仲有一個鐘
突然接到Jacky信息
“有空回電給我, 老闆要你今晚搬走"
馬上衝去搵阿爽算賬
“你今朝朝早唔記得熄我個煮食爐, 我叫你又唔聽"
"我承認無熄到係我錯, 我再一次道歉, 但你幾時有叫過我, 個田咁大我完全聽唔到
你有事搵我點解lunch見到我唔當面講"
"我叫幾次無人應就唔再叫"
"好, 就算你要我走, 你都應該係當面同我講要我走, 我要安排地方住
我全日淨係專心幫你摘你d爛鬼豆, 而家已經有7盒, 收工應該有8盒
而家即刻走, 你有無諗過咁我今晚點?"
講到呢度, 阿爽嘅表情似乎知道自己理虧
就喺呢個時候, Jacky打黎同我講隔離青瓜農場請人, 仲話青瓜有蓋唔洗曬, 老闆係女人好安全
唔通仲要諗? 梗系即刻辭職啦!
理虧嘅阿爽知道我要走
態度即刻轉軟, 同我講一般農場唔會包伙食
但我留低佢會繼續包一日三餐
而且我開始越摘越快, 好快可以賺得番
臨走仲送上可樂, 再補句"我無曬你飲開嘅橙汁喇"
可惜我理得你喺未搵到人替我之前d豆摘唔晒餼幾多錢
好馬不吃回頭草
898!!!
PS. 如果有機會去摘長豆謹記要買厚膠紙
膠布係無用的因為太薄
長豆其實話差唔差, 至少唔系太曬同唔洗屈身摘, 亦唔算特別重, 照顧好手指就好
No comments:
Post a Comment